1Cor 13 | KYG | STEP | Nagaemo ma mopafi vaya'ai apakefati'e enisole vaya'ai apakefati'e'mo nagemo ne'aisuvana nahau nayamopafi'mo no'nahausige'na velo'mo ne'amagigeno'ae'mo afa agemo aige yave'yamo ne'amagigeno'ae'mo afa agemo aige huno age ne'aiya kava hu'na afa gemo nehuguve.

1 Corinthians 13

Hapau apayamopafi'mo nehapaiya kavafe'mo hu'niya gemae

1 Nagaemo ma mopafi vaya'ai apakefati'e enisole vaya'ai apakefati'e'mo nagemo ne'aisuvana nahau nayamopafi'mo no'nahausige'na velo'mo ne'amagigeno'ae'mo afa agemo aige yave'yamo ne'amagigeno'ae'mo afa agemo aige huno age ne'aiya kava hu'na afa gemo nehuguve. 2 Gotitegati gemo alini'ne'na ae'na hakalo huge muki fala ki'niya gemo afige muki gemo alagepa hu'na afige Gotife'mo mago'e hu'na nagesa afi'na fatago nehu'nae'mo avemo afa'a ali'na yaga au'na alu yategamo atalege hu'na ne'maisuvana nahau nayamopafi'mo no'nahausi'mo'mo ina agufa vekamo mai'nove. 3 Nagaemo muki kagemi ya'nimo kagemi ya'apimo ohane'nisiya vaya'mo apami'na hano hisuvafe'mo ali'na apamite apamite hu'na apamige vaya'mo hapa mae'na fali'na apatesuvafe'mo atamo'mo leno nasagalisige'na falige hu'na mai'nisuvana nahau nayamopafi'mo no'nahausi'mo'mo ani agufa kava'a'nimo'a naha o'maegaiye.

4 Hapau apayamopafi'mo nehapaiya vaya'mogimo apakaetegamo hosu kava'mo nehage'apae'mo malage hu'a hosu kava'apimo anona'apile'mo hosu kava'mo osu'a vase hu'a yuna he'a magokepi lokae'a ne'maiye. Ani agufa hapau apayamopafi'mo nehapaiya vaya'mogimo apaipa kafamo ohapae'a apakai'api apaki'apile'mo ali'a asaga osu'a, hogote vaya'mo mai'none, hu'a apakesamo no'afiye. 5 Ani vaya'mogimo vaya'aitegamo himu'namu kava'mo osuge apakai'apige'mo alagepa hu'a maisaya kavafe'mo hapa'ye nehige'a kahauya osuge malage huno apaipamo olege hu'a ne'maiye. Mai'ne'a vaya'ai hosu kava'apie'mo lekana pai'a apakesamo no'afiye.

6 Apakaemo hosu kavafe'mo amuse osu'a alagepa kavafeke'mo apamogaga ne'aiye. 7 Kalaisi agi'alefe'mo muki kana ya'mo alige muki Goti ge'ae'mo apakesa afi'a fatago huge muki kava'amo afole aigiye, hu'a agava mai'ne'a apavayagunagu huge muki hanageke ya'mo ne'ali'apae'mo o'atale'a atafau'a alagi huge hu'a ne'maiye.

8 Hapau apayamopafi'mo nehapaiya kava'mo alagi hano osugiya'monanafa hemenimo apaune vaya'mogi apaune ge huge mago vaya'mo alu apake alu apakemo aige apaune kava hu'a agege hu'a nehaya kava'e muki ani agufa kava'amo alagi hano hugiye. 9 Hemenimo lagaemo aise'amo afi'neta aeta hakalo huta hapa nepauna'monanafa 10 henaga'amo alagepa huta ageteta afisuna afina'mo afole aisigetae'mo hemenimo ika ika huta ne'afuna kava'mo alagi hano hugiye.

11 Mafa'nemo mai'ne'nae'mo mafa'negana hu'na ge huge naipafi'mo agege nagesamo afige hu'na mai'nove. Kosi'na alopa vekamo ne'mai'nae'mo mafa'ne'nile nehuva kava'mo ago atale'nove. 12 Hosu lave'yofati'mo apaugosamo ne'agaya kava huta hemenimo hani hu'nigeta alagepa huta no'agona'monanafa henaga'amo Ala kava ne'mo augosafi'mo ageta alagepa hugune. Hemenimo aise'amo ne'agovanage'na Goti'a nage'niya kava hu'na henaga'amo alagi age'na alagepa huguve. 13 Hemenimo lole'e mago'e kava'mo hane'niyana apakesa afi'a fatago nehaya kava'mo hanete alagepa kava'mo afole aigiye, hu'a hute'a agava ne'mai'a apavayagunagu nehaya kava'mo hanete hapau apayamopafi'mo nehapaiya kava'mo hanete huno hane'niyanageno alagi hanege hanege huno hanegaiye. Mani lole'e mago'e kavapati'mo aeno agaseno hogote kava'mo hane'niyana hapau apayamopafi'mo nehapaiya kava'mo hane'niye.